LOML | Love Of My Life (101)

𝐋𝐎𝐌𝐋 (𝑳𝒐𝒗𝒆 𝒐𝒇 𝒎𝒚 𝒍𝒊𝒇𝒆) ❣️:101

Kwahiyo akipata dili kubwa na yeye hana mzigo anakuja kwangu, ananiunganisha mimi na kuna namna tunafidia hilo. Maisha yanaenda. Hivyo alinipigia na mimi nilimwambia ya kuwa nipo kazini.

Na yeye aliniambia kuhusu hao wateja na wanahitaji kwa haraka niwashughulikie. Nikamuuliza “ina maana hutokuja?”
Akaniambia kwa upole “leo nimebanana ila nitapita hapo kaka.”
Nilitabasamu tu.

Basi nilianza kazi, kwakweli kampuni aliniunganisha nayo ni kubwa. Nilijipanga na team yangu na kushughulikia kila kitu. Ilikuwa ni nzuri sana. Kazi ilienda sawa na watu walikuwa wanafurahia. Mimi nikaendelea na mambo yangu.

Ilifika mpaka saa 6 hivi, bado nilikuwa ofisini. Kushika simu yangu, ina meseji za kutosha kutoka kwa mke wangu. Nilipofungua ni analalamika, anaomba msamaha.

Kuna moja aliniandikia “Mpenzi, usiniache hivi, nitakufa mimi, nakuomba mume wangu, nakuomba mimi nipo tayari kufanya lolote lile ili mradi unisamehe. Nakuomba mume wangu.”

Nilishusha pumzi na simu yangu iliita.Alikuwa ni baba yangu. Nilipokea na kumsalimia baba yangu. Baba yangu aliniuliza “upo wapi kijana wangu?”
Nilimwambia baba yangu “nipo kazini baba.”

Baba alisikitika akisema “nilijua jana umenielewa mwanangu. Mtoto wa watu huyu, yupo hospitali. Kila mtu anajua kuwa mmepoteza mtoto. Na wewe haupo hapa baba yako nitajibu nini?”

Nilichoka na kusema “hata lini baba tutafanya mambo kwaajili ya kufurahisha watu wengine. Sio lazima mimi kuwepo hapo. Gabriella anajua alicho kifanya.”